கோவையைச் சேர்ந்த புகழ்பெற்ற கண்டுபிடிப்பாளரான ஜி.டி. நாயுடு, ஆட்டோமொபைல், மின்னணுவியல், வேளாண்மை மற்றும் பொறியியல் உள்ளிட்ட பல துறைகளில் எண்ணற்ற கண்டுபிடிப்புகளை உருவாக்கினார்.

பொதுமக்களின் அன்றாட வாழ்க்கையை எளிதாக்கும் வகையில் குறைந்த செலவில் தொழில்நுட்பத்தை வழங்க வேண்டும் என்ற நோக்கத்துடன் அவர் செயல்பட்டார். அதனால், அவரது பல கண்டுபிடிப்புகள் அந்தக் காலத்தை விட பல ஆண்டுகள் முன்னேறிய சிந்தனைகளாக அமைந்தன.

"இந்தியாவின் எடிசன்" என்று போற்றப்படும் ஜி.டி. நாயுடு, மக்களின் அன்றாட பிரச்சினைகளுக்கு தீர்வு காணும் பல்வேறு கருவிகளை வடிவமைத்தார். அவரது பல கண்டுபிடிப்புகள் வெளிநாடுகளில் பாராட்டைப் பெற்றாலும், அரசின் போதிய ஆதரவு இல்லாததாலும், அக்காலத்திய உரிமம் தொடர்பான கட்டுப்பாடுகள் காரணமாகவும், கண்டுபிடிப்புகளில் சில மட்டுமே பொதுமக்களின் பயன்பாட்டுக்கு வந்தன.

போக்குவரத்து மற்றும் ஆட்டோமொபைல்

டிரான்ஸ்போர்ட் தொழிலை நடத்தி வந்த ஜி.டி. நாயுடு, அதில் எதிர்கொண்ட சவால்களுக்குத் தீர்வாக பல தொழில்நுட்ப கருவிகளை உருவாக்கினார்.

அதிர்வு அளவீட்டு கருவி (Vibration Tester):

பேருந்து இயங்கிக்கொண்டிருக்கும்போதே அதன் எஞ்சினில் ஏற்படும் அதிர்வுகளை அளவிடும் கருவியை உருவாக்கினார். இதன் மூலம் எஞ்சின் கோளாறுகளை முன்கூட்டியே கண்டறிய முடிந்தது.

மேம்படுத்தப்பட்ட ரேடியேட்டர்:

அந்தக் காலத்தில் பேருந்து ரேடியேட்டர்களில் குளிரூட்டுவதற்காக அடிக்கடி தண்ணீர் நிரப்ப வேண்டியிருந்தது. இதைத் தவிர்க்கும் வகையில், நீண்ட நேரம் தண்ணீர் நிரப்பத் தேவையில்லாத ரேடியேட்டர் அமைப்பை வடிவமைத்தார்.

டீசல் நாசில்:

முழுக்க முழுக்க உள்நாட்டு தொழில்நுட்பத்தில் டீசல் நாசிலை உருவாக்கினார். இது வெளிநாடுகளிலும் பாராட்டைப் பெற்றதுடன், அப்போது இறக்குமதி செய்யப்பட்ட பல நாசில்களை விட சிறந்ததாகக் கருதப்பட்டது.

குறைந்த விலை கார்:

1952-ஆம் ஆண்டு வெறும் ரூ.2,000 விலையில் இருவர் பயணிக்கக்கூடிய பெட்ரோல் காரை உருவாக்கினார். ஆனால், அக்காலத்திய தொழில்துறை உரிம விதிமுறைகள் காரணமாக, அதை வணிக ரீதியாக உற்பத்தி செய்ய முடியவில்லை.

மின்னணு மற்றும் வீட்டு உபயோக கருவிகள்

ராசண்ட் எலக்ட்ரிக் ஷேவர் மற்றும் UMS பிளேடு:
இந்தியாவில் பேட்டரியில் இயங்கும்  முதல் எலக்ட்ரிக் ஷேவரை கண்டுபிடித்தார். அதனுடன் பயன்படுத்தப்பட்ட UMS பிளேடு மிகவும் மெல்லியதாகவும், வளைந்து கொடுக்கும் தன்மையுடனும், நீண்ட நாள் பயன்படும் வகையிலும் இருந்தது. அக்காலத்தில் உலகின் சிறந்த பிளேடுகளில் ஒன்றாக அது கருதப்பட்டது.

தானியங்கி டிக்கெட் வழங்கும் இயந்திரம்:
மின்னணு டிக்கெட் முறை பரவலாக அறிமுகமாகும் பல ஆண்டுகளுக்கு முன்பே, பேருந்துகளுக்கான தானியங்கி டிக்கெட் வழங்கும் இயந்திரத்தை உருவாக்கினார்.

மண்ணெண்ணெயில் இயங்கும் மின்விசிறி:
மின்சாரம் வசதி இல்லாத கிராமப்புற மக்களுக்காக, மண்ணெண்ணெய் விளக்கின் வெப்பத்தைப் பயன்படுத்தி இயங்கும் விசிறியை வடிவமைத்தார்.

வாக்குப்பதிவு இயந்திரம்:

தேர்தல் முறைகேடுகளைத் தடுக்கும் நோக்கில் வாக்குப்பதிவு இயந்திரத்தை உருவாக்கினார். அதில், தற்போதைய NOTA வசதியைப் போன்றே, அனைத்து வேட்பாளர்களையும் நிராகரிக்கும் தேர்வும் இடம்பெற்றிருந்தது என்பது அதன் சிறப்பம்சமாகும்.

பிற முக்கிய கண்டுபிடிப்புகள்

இசைத்தட்டுகளை தானாக இயக்கும் ஜூக் பாக்ஸ் (Jukebox), பழச்சாறு பிழியும் இயந்திரம், இயந்திரக் கால்குலேட்டர் (Mechanical Calculator), இரும்பு பொருட்களில் ஏற்படும் விரிசல்களை கண்டறியும் கருவி ஆகியவற்றையும் ஜி.டி. நாயுடு உருவாக்கினார்.

கண்டுபிடிப்பாளர்களுக்கு உத்வேகம்

அரசின் போதிய ஆதரவு, முதலீடு மற்றும் தொழில்துறை அனுமதிகள் இல்லாத காரணத்தால், ஜி.டி. நாயுடுவின் பல கண்டுபிடிப்புகள் வணிக உற்பத்தியை எட்டவில்லை. இருந்தபோதிலும், அவரது கண்டுபிடிப்புகளும் சிந்தனைகளும் இன்றளவும் புதிய தலைமுறை கண்டுபிடிப்பாளர்களுக்கு உத்வேகம் அளித்து வருகின்றன.

தற்போது, ஜி.டி. நாயுடுவின் பல அரிய கண்டுபிடிப்புகள் கோவையில் உள்ள Gedee Car Museum மற்றும் Gedee Science Museum-இல் பாதுகாக்கப்பட்டு, இந்தியாவின் தலைசிறந்த கண்டுபிடிப்பாளர்களில் ஒருவரான அவரது அறிவாற்றலையும் தொலைநோக்கு பார்வையையும் உலகுக்கு எடுத்துக்காட்டி வருகின்றன.