கோவை,
கோவைக்கு செல்லும் வாய்ப்பு கிடைத்தால், சில மணி நேரங்களை ஒதுக்கி ஜி.டி. அருங்காட்சியகத்தை பார்வையிடுங்கள். பள்ளி கல்வி முழுமை பெறாத நிலையிலும், தனது காலத்தை விட பல ஆண்டுகள் முன்னோக்கிச் சிந்தித்த கண்டுபிடிப்பாளரான ஜி.டி. நாயுடுவின் வாழ்க்கைப் பயணத்தையும், அவரது அபூர்வமான படைப்புகளையும் இந்த அருங்காட்சியகம் வெளிப்படுத்துகிறது.

ஜி.டி. நாயுடுவின் அசத்தலான கண்டுபிடிப்புகள்

அருங்காட்சியகத்திற்குள் நுழைந்தவுடன் முதலில் கண்களில் படுவது, ஜி.டி. நாயுடு உருவாக்கிய பல்வேறு கண்டுபிடிப்புகளின் தொகுப்பாகும். எளிமையானவை முதல் வியப்பூட்டும் கருவிகள் வரை, ஒவ்வொன்றும் அன்றாட வாழ்க்கையில் மக்களுக்கு உதவும் வகையில் உருவாக்கப்பட்டவை.
அவரது ரேசர் பிளேடு, மின்சார ஷேவர், பழச்சாறு பிழியும் கருவி, பல்வேறு அளவீட்டு சாதனங்கள் உள்ளிட்ட பல கண்டுபிடிப்புகள் இங்கு காட்சிப்படுத்தப்பட்டுள்ளன. அதுமட்டுமல்லாமல், அவர் வடிவமைத்த விவசாய உபகரணங்கள் மற்றும் உருவாக்கிய புதிய பயிர் ரகங்கள் பற்றிய தகவல்களும் இடம்பெற்றுள்ளன. இதன் மூலம், இயந்திரங்கள் மற்றும் வாகனங்கள் மட்டுமின்றி, விவசாயத் துறையிலும் ஜி.டி. நாயுடுவின் ஆர்வம் மற்றும் பங்களிப்பு எவ்வளவு விரிவானது என்பதை அறிய முடிகிறது.
காட்சிப்படுத்தப்பட்டுள்ள பொருட்கள் அனைத்தும், அவர் என்னென்ன கண்டுபிடித்தார் என்பதை மட்டுமல்லாமல், ஏன் அந்தக் கண்டுபிடிப்பை உருவாக்கினார் என்பதையும் பார்வையாளர்கள் எளிதில் புரிந்துகொள்ளும் வகையில் வைக்கப்பட்டுள்ளன. மக்களின் அன்றாட வாழ்க்கையை எளிமையாக்கவும், குறைந்த செலவில் பயனுள்ள தொழில்நுட்பத்தை வழங்க வேண்டும் என்பதே அவரது பல கண்டுபிடிப்புகளின் அடிப்படை நோக்கமாக இருந்தது.

பழமையான கார் பிரியர்களுக்கு விருந்தாக இருக்கும் அருங்காட்சியகம்

ஜி.டி. அருங்காட்சியக வளாகத்தில் அமைந்துள்ள பழமையான கார் அருங்காட்சியகம், பார்வையாளர்களை அதிகம் கவரும் பகுதிகளில் ஒன்றாகும். அரிதாகவே காணக்கூடிய பல பழமையான வாகனங்கள் இங்கு காட்சிக்கு வைக்கப்பட்டுள்ளதால், பெரும்பாலானோர் அதிக நேரத்தை இந்தப் பகுதியில் செலவிடுகின்றனர்.
உலகின் முதல் காப்புரிமை பெற்ற கார் எனக் கருதப்படும் Benz Patent-Motorwagen-ன் மாதிரி (Replica) இந்த அருங்காட்சியகத்தின் முக்கிய அம்சங்களில் ஒன்றாகும். இதனுடன், Rolls-Royce, Ford, Chevrolet, Volkswagen Beetle உள்ளிட்ட பிரபல நிறுவனங்களின் கிளாசிக் மாடல்களைச் சேர்த்து 100-க்கும் மேற்பட்ட பழமையான வாகனங்கள் இங்கு இடம்பெற்றுள்ளன.

குழந்தைகளுக்கான அறிவியல் அனுபவ மையம்

வரலாற்றை மட்டும் சொல்லாமல், அறிவியலை நேரடியாக அனுபவிக்கும் வாய்ப்பையும் இந்த அருங்காட்சியகம் வழங்குகிறது. வளாகத்தில் அமைந்துள்ள பரிசோதனை அறிவியல் மையத்தில், மாணவர்கள் செய்முறை மூலம் அறிவியல் கோட்பாடுகளைப் புரிந்துகொள்ளும் வகையில் பல்வேறு இன்டராக்டிவ் மாதிரிகள் அமைக்கப்பட்டுள்ளன.
வகுப்பறைக்கு அப்பால் அறிவியலை சுவாரஸ்யமாகக் கற்றுக்கொள்ளும் சூழலை இந்த மையம் உருவாக்குவதால், குழந்தைகள் மற்றும் மாணவர்களுக்கு இது ஒரு சிறந்த அனுபவமாக அமைகிறது.

ஜி.டி.நாயுடுவின் வாழ்க்கைப் பயணத்தை சொல்லும் அருங்காட்சியகம்

இந்த அருங்காட்சியகம் வெறும் கண்டுபிடிப்புகள் மற்றும் பழமையான வாகனங்களின் தொகுப்பாக மட்டுமல்ல. முறையான கல்லூரிக் கல்வி இல்லாத நிலையிலும், தனது திறமை, விடாமுயற்சி மற்றும் புதுமையான சிந்தனையால் இந்தியாவின் தலைசிறந்த கண்டுபிடிப்பாளர்களில் ஒருவராக உயர்ந்த ஜி.டி. நாயுடுவின் வாழ்க்கைப் போராட்டத்தையும் சாதனைகளையும் எடுத்துக்கூறும் இடமாக இது திகழ்கிறது.
எனவே, ஜி.டி. அருங்காட்சியகத்தை சுற்றிப் பார்ப்பது என்பது பழமையான இயந்திரங்களையும் வாகனங்களையும் பார்ப்பதற்கான பயணம் மட்டுமல்ல; ஒரு சாதாரண மனிதர் தனது புதுமையான சிந்தனையால் உலகின் கவனத்தை எவ்வாறு ஈர்த்தார் என்பதை உணர்த்தும் ஊக்கமூட்டும் அனுபவமாகவும் அமைகிறது.